🙏 මිනිසා මෙලොව උපදින විට කිසිදු ධර්මයක්, ශිල්පයක් හෝ ශාස්ත්රයක් දන්නේ නැත. නොදන්නා දේ දැනගැනීමටත්, ජීවිතය යහපත් මඟකට යොමු කර ගැනීමටත් මඟ පෙන්වන්නෝ ගුරුවරුය.
ගුරුවරයා විසින් ශිෂ්යයාට දැනුම ලබා දීම පමණක් නොව, යහපත හා අයහපත හඳුනා ගැනීමටත්, වැරදි මඟින් වැළකී යහපත් ජීවිතයක් ගත කිරීමටත් මඟ පෙන්වයි.
එබැවින් ගුරුවරයා ශිෂ්යයාගේ ජීවිතය ආලෝකවත් කරන පරම උපකාරකරුවෙකි. මාපියන්ට මෙන්ම ගුරුවරුන්ටද ශිෂ්යයන් විසින් ගෞරවයෙන් හා ආදරයෙන් සැලකිය යුතුය.
🌼 ශිෂ්යයාගේ යුතුකම් 🌼
තථාගතයන් වහන්සේ සිගාල ගෘහපති පුත්රයාට ගුරු–ගෝලයන්ගේ යුතුකම් දේශනා කළ සේක.
ගුරුවරයා දුටු විට ගෞරවයෙන් නැඟී සිටීම, උපස්ථානයට පැමිණීම, ගුරුවරයාගේ අවවාද හා උපදෙස් මැනවින් අසා පිළිපැදීම, අවශ්ය වත්පිළිවෙත් කිරීම සහ උගන්වන ශිල්පය උනන්දුවෙන් හා මනා කොට ඉගෙනීම ශිෂ්යයාගේ යුතුකම් වේ.
🌸 ගුරුවරයාගේ යුතුකම් 🌸
ශිෂ්යයා විසින් තම යුතුකම් ඉටු කරන විට ගුරුවරයාද ශිෂ්යයා කෙරෙහි අනුකම්පාවෙන් හා කරුණාවෙන් කටයුතු කළ යුතුය.
කළ යුතු දේ හා නොකළ යුතු දේ කියා දී ශිෂ්යයා මනා ලෙස හික්මවීම, ශිල්ප ශාස්ත්ර නිවැරදිව ඉගැන්වීම, දැනුම සඟවා නොගෙන මනා ලෙස ලබා දීම, ශිෂ්යයාගේ දක්ෂතා හඳුනාගෙන ඔහුට ඉදිරියට යාමට අවස්ථා සලසා දීම සහ ඔහුගේ යහපත හා ආරක්ෂාව ගැන සැලකිලිමත් වීම ගුරුවරයාගේ යුතුකම් වේ.
🌿 ගුරු–ගෝල සම්බන්ධතාවය 🌿
ගුරුවරයා හා ශිෂ්යයා අතර තිබිය යුත්තේ ගෞරවය, විශ්වාසය, කරුණාව හා වගකීම මත ගොඩනැඟුණු සම්බන්ධතාවයකි.
ගුරුවරයාට ගරු කරන, අවවාද පිළිපදින, උනන්දුවෙන් ඉගෙන ගන්නා ශිෂ්යයා තම ජීවිතය සාර්ථක කර ගැනීමට හැකි වේ.
එමෙන්ම ශිෂ්යයාගේ දැනුම පමණක් නොව ඔහුගේ යහපත් චරිතයද ගොඩනඟා දෙන ගුරුවරයා සමාජයට මහත් සේවයක් සිදු කරයි.
🙏 ගුරුවරයාට ගරු කිරීමත්,
ගුරුවරයාගේ යහපත් අවවාද පිළිපැදීමත්,
උගත් දැනුම යහපත සඳහා භාවිත කිරීමත්
සෑම ශිෂ්යයකුගේම උතුම් වගකීමකි.
🌺 “ගුරුවරයා දැනුම ලබා දෙන ආලෝකයකි.
එම ආලෝකයෙන් තම ජීවිතය ආලෝකවත් කර ගැනීම
ශිෂ්යයාගේ වගකීමයි.” 🌺
📖 රේරුකානේ චන්දවිමල මහනාහිමියන්ගේ
“බෞද්ධයාගේ අත්පොත” ඇසුරෙන් 🙏